Khamis, 13 Ogos 2009

SALAM PERINDUNGAN....

Lama nya daku inda manulis...bukan nya apa tangahnya...
luan cibuk nyamu...mangunjar usin....
apalagi taaa asyik outstation saja...
ehehehe..kurapak omputih ehhh...
nanti-nanti tah bila ada banyak masa
kediaku magalimut lagi.......bye...
"MALAS TAH KU INGAU"

Ahad, 7 Jun 2009

"DUNIA ANI PANUH DANGAN USIN'

Salam eh... paradian smua.

sangal ba patuan biskita ani. mana kan minggu ani tarlalu ramai orang kahwin.
inda dapat patuan kan menaga semua rumah. mana yang mampu saja. bila menaga orang kahwin ani tapikir patuan 1 perkara. Banar nya orang kaya-kaya ani, dunia ani panuh usin. tinggal katani saja yang magambil nya. bukan mancari. yang salalu dicari ani barang ilang. atutah kadang-kadang payah kan mandapat usin ani. cuba liat saja orang kahwin, smua orang yang datang pasti membarakan sampul surat sama orang rumah. inda taulah barapa dalamnya, tapi mun dikira sorang membagi RM10, mun seratus orang tangah berapa jumlahnya. kira macam badagang resotaran pulang. hehhehehe. BANAR KALI AR

Jumaat, 5 Jun 2009

damanku tarus...

Asalamualikum kaula,

bukan memurancah...tapi kan mendulur mata ar., inda ku tau apa kan ku kongsi kali ani
cuma kan bkurapak pasal ? tiba-tiba lalapku'

Rabu, 3 Jun 2009

apa habarnya????

Apa habar biskita? Mudah-mudahan katani semua mandapat rahmat jua darinya. Sadar-sadar inda sadar sudah satangah tahun tani dalam tahun 2009 ani , laju banar masa beredar. Cuba tani kanang-kanang balik , apa yang sudah tani capai dalam hidup ani? Sama ada untuk diri sandiri atau peradian. Mun sudah tarcapai apa yang dihajati Alhamdulilah , tapi mun alum , baik tah musabah diri balik, mana tau ada salah dan silap tani yang tani inda sengaja. Mun kan betuturan soal cita-cita ani , aku salalu parhatikan , bila masa tangah sakolah dulu , bila cikgu tanya , sudah basar kan jadi apa ? mijoroti mamamg menjawab , paling cikai pun kan jadi askar sama pulis. Mun kan jadi pilot sam jadi cikgu jan tah cerita, tapi parnah kah biskita mandangar ada anak murid ani , mambaritau yang ia sudah basar kan jadi sekuriti ka? Tukang sapu ka? Ataupun pemandu(Driver) ? mana adakan. Bukan kan marista ar , tapi apa hakikatnya sakarang ani? Bukan kan mangucapkan orang-orang yang bakarja camani. Tapi atu tah realitinya, kadang-kadang tani tarpaksa buat karaja yang bukan jadi idaman tani , tapi tarpaksa tani buat jua untuk mandapatkan USIN. Apakah ani takdir dari tuhan? Inda pakah, sabab setahu ku semua manusia diBumi ani ada masa 24 jam sehari , baik ia kuli atau Boss. Adakah yang jadi peguam atau doktor atu masanya 25 jam sehari atau tukang sapu atu hanya 23 jam sehari ? nadakan , semuanya pun sama 24 jam sehari. Tapi parsoalanya , kanapa masih ada yang punya pandapatan RM 5000 sebulan , ada yang RM 500 sebulan?
Apakah ianya faktor dari kelulusan sakolah. Rasanya inda , sebab udah ramai dangsanak tani yang nada pelajaran bulih jua jadi kaya. Macam contoh kadiaku ada saorang kawan , sakolah sampai darjah 6 saja , tapi dalam hidupnya inda parnah makan gaji , kan badagang saja krajanya, sakarang ani sudah masuk 35 tahun umurnya sudah ia ada 5 buah kereta mewah , dan dapan namanya ada TITLE DATO dalam bisnes kadnya.Bila ku tanya apa rahsianya , ia cakap samua manusia sama, ada gargasi dalam diri tani , tapikadang-kadang katani saja inda tau. Gargasi yang dimaksudkanya ialah POTENSI DIRI.
Mun kan tahu pasal potensi diri , next time aku nulis pasal barang ani.

Kadiaku chow dulu

"LALAH MANGUJAR USIN"

apa habarnya biskita...? mudah-mudahan biskita dalam kana lindungi Allah swt.

Kadiaku ani baru mulih dari badagang dari tanah basar sabah. orang cuti aku badagang pulang.
tantu biskita hairan kan. tapi camatulah. nada istilah cuti bagi orang badagang mcm kediaku ni.
lalah tu lalah jua, mun sudah memurancah atu inda tantu tampat, karana babubut kasana kamari badagang, atu tah inda tantu tampat kan mamurancah. dimana rasa kan lalap, disana tanah hanyut. Banar kata bisdia, bukan sanang kan jadi sanang, bukan susah kan jadi susah.
untuk kali ani inda banyak kan ku kurapakan, lalah ku lakat. nanti tah aku bakurapak lagi. ok tangahnya ar, aku mulih dulu....

Rabu, 27 Mei 2009

"KALI ANI TIA..."

Salam kirim salam arrr...


Ba, apa habarnya biskita? kali ani tia, batah udah kediaku manunggu ada orang-orang katani yang mambuat blog untuk bangsa Berunai atau kadayan, tapi inda parnah ku tajumpa, ada pun nama blognya saja bunyi bahasa katani, tapi isi kandungnya masih gunakan bahasa standard. kali ani tia, biar tia bisdia yang bukan bangsa berunai atau inda paham. baru sanang katani mengelimut bisidia ani....banar kali arr.....EDITOR